خلال ندوة في مهرجان الجونة.. أمينة خليل تكشف سر تعاونها المتكرر مع المخرج كريم الشناوي: «أشعر معه بالأمان»

تحدثت الفنانة أمينة خليل عن كيفية اختيارتها لأدوارها وما يحمسها لتقديمها، وذلك خلال ندوة «اختيارات الممثل.. من يصنع الأداء؟»، التى أقيمت ضمن فعاليات اليوم الثالث من الدورة التاسعة لمهرجان الجونة السينمائى، وتطرقت إلى كواليس اختيار الممثلين لأدوارهم، والعوامل التى تحكم قراراتهم الفنية، وأهمية العلاقة بين الممثل والمخرج فى بناء الشخصية وتطويرها، إلى جانب تأثير السوشيال ميديا فى اختيارات الفنانين.

وقالت أمينة خليل: «أنا بجرى وراء القصة الحلوة، وبصدق إن ده الشيء اللى بيجذبنى لأى عمل، هو النداهة بتندهنى، وأول ما أقرأ الورق بحس إنى عاوزة أعيش كل حاجة فى شريط مشاعر الشخصية دى، وده اللى بيشدنى لعمل عن غيره».

وأضافت: «بعد كده بنقعد نقرأ الاسكريبت مع المخرج، وبنفضل نتكلم كتير وإحنا بنعمل بروفايل الشخصية. الحديث مع المخرج بالنسبة لى ما بينتهيش، ودى أحسن مرحلة عندى، لأننا بنبدأ نبنى الشخصية ونفهم تفاصيلها ودوافعها. المخرج عنده عناصر كتير ورؤية كاملة للعمل، وأنا جزء من البناء اللى هو بيعمله، ودى حاجة لذيذة جدًا بالنسبة لى».

وعن تعاونها المتكرر مع المخرج كريم الشناوى، قالت أمينة خليل: «أحترم كريم الشناوى لأنه شخص موهوب وشغوف ومدير محترف وذكى. أنا مرتاحة معه وأشعر معه بالأمان، وبيحكى قصصه بطريقة مميزة جدًا، مش من خلالى كممثلة بس، لكن من خلال كل عناصر العمل. عنده أحلام وعارف إزاى يحققها».

وتابعت: «كريم بيحترم مخى وفكرى، ومش بيستخدمنى كأداة أو سلعة، وده شيء بحترمه جدًا فيه. بيدينى مساحة، وده بيخلينى أبدع أكتر. ونجاحنا له طرف ثالث، وهى الكاتبة مريم نعوم، لأنها عنصر مهم فى نجاحنا مع بعض، وإحنا التلاتة بنشتغل من قلبنا».

وأضافت: «كنت محظوظة إننا لقينا بعض كثلاثى نشتغل مع بعض، واتَبسطنا فى الشغل، وحسينا إننا شبه بعض، وعلشان كده كملنا. وجود تفاهم وثقة بين الممثل والمخرج والمؤلف بيفرق جدًا فى النتيجة النهائية».

وأكدت أمينة خليل أنها لا تحكم على الشخصيات التى تقدمها، قائلة: «عمرى ما هحكم على الشخصية اللى بعملها، ومش هعمل شخصية غير لما أكون بحبها. أنا مش بفكر كتير قبل ما أوافق على أى شخصية، باخد قرارى على طول، ومبشغلش نفسى إذا كان كل الناس هتحب الدور ده ولا لأ. ببص فى ورقتى وفى العمل اللى بشتغله، ومش بدى مساحة لشوشرة السوشيال ميديا، ولا هخاف منها لدرجة إنى مبقاش عارفة أعمل حاجات قوية».

أحمد مالك وأمينة خليل وسلمى أبو ضيف وياسمينا العبد وسارة طيبة يكشفون كواليس اختيار أدوارهم فى مهرجان الجونة