أحمد مالك عن «اختيارات الممثل»: الإمكانات الإنتاجية تتيح للممثلين فى الخارج الاستعداد لأدوارهم بصورة أكبر

تتواصل فعاليات الدورة التاسعة لمهرجان الجونة السينمائي الدولي بحضور نجوم وصناع السينما، وأقيمت ندوة بعنوان «اختيارات الممثل.. من يصنع الأداء؟»، التي ناقشت كواليس اختيار الممثلين لأدوارهم، وتجارب المشاركين فى اختيار الأدوار، وبناء الشخصيات، والعوامل التى تحكم قراراتهم الفنية، وأهمية العلاقة بين الممثل والمخرج فى بناء الشخصية وتطويرها، وطبيعة التعاون بين الممثل والمخرج والكاتب، إلى جانب تأثير السوشيال ميديا فى اختيارات الفنانين.

وشارك فى الندوة النجوم: أحمد مالك، وأمينة خليل، وسلمى أبو ضيف، وياسمين العبد، والكاتبة والممثلة سارة طيبة، كما شهدت الندوة حضور عدد من الفنانين وصناع السينما، من بينهم والد أمينة خليل، ومايان السيد، وركين سعد، وصدقى صخر، والمخرج كريم الشناوى، وداليا شوقى، مينا مسعود.

واستهل الفنان أحمد مالك الندوة بحديثه عن اختياراته لأدواره قائلا: «أحاول دايمًا أقدم دور جديد ومكررش نفسى، خلصت مسلسل كنت فيه الوحيد اللى مش إنجليزى، وبقدم شخصية إيجابية، واقترحت عليهم إن الشخصية تكون نصها مصرى، وقلت لهم: ليه متخلوش الشخص ده نصه مصرى؟ أنا مش إنجليزى زيكم، ورحّبوا بالفكرة، وبدأنا نبنى الشخصية من جديد، لأنها بطل ضمن الحكاية، والمسلسل هيتعرض على Apple قريب».

وأضاف «مالك»: «فى مصر صناع الفن بيحبوا الشغل، وكل واحد فى مصنع الإنتاج بيعمل أكتر من حاجة، والشغف عالى، وناس كتير بتعمل حاجات ببلاش علشان تحرك الشغل وتساعده يطلع للنور، لكن السيستم بره مصر مختلف، كل واحد له دور محدد، ومفيش حد بيعمل حاجة غير شغله، ومفيش تطوع من حد علشان يعمل مهمة مش مسؤوليته، وده بيخلى طريقة العمل مختلفة عن اللى بنشوفه هنا، اللى ممكن توصل أحيانًا للعشوائية».

وتابع: «خلصنا مسلسل مع المخرج هادى الباجورى، أنا وياسمينا العبد، ونادر لما تلاقى مخرج يديك المساحة بالشكل ده، هادى مخرج بيؤمن بالتجربة والاكتشاف، ومش داخل الشغل بمنطق إنه فاهم كل حاجة، لكنه بيسيب مساحة للممثل إنه يجرب ويكتشف، وده فى رأيى معنى القائد الحقيقى».

وأوضح أحمد مالك أن الإمكانات الإنتاجية تتيح للممثلين فى الخارج الاستعداد لأدوارهم بصورة أكبر، قائلًا: «الميزانيات بره بتسمح إن الممثل يتدرب من بدرى، وفى فيلم «العملاق» تدربت 5 أسابيع، ولقيت ده كمان مع المخرج هادى الباجورى، لما قعدت مع دكتور متخصص فى المخدرات علشان أفهم تفاصيل الشخصية اللى بقدمها».

وأضاف «مالك»: «الممثل زى المحامى، حتى لو مش طايق الشخصية اللى بيقدمها، لازم يفهم هى بتعمل كده ليه، لازم أفهم دوافع الشخصية، حتى لو بقدم دور قاتل أو سفاح، وأعرف إيه اللى وصلها إنها تعمل كده. مش مطلوب منى أحكم على الشخصية، لكن أفهمها وأعرف أقدمها بشكل مقنع».

طارق العريان يكشف مفاجآت الجزء الرابع من «ولاد رزق» (فيديو)