راندا البحيري تكشف تفاصيل رحلتها مع المرض بعد 7 سنوات من المعاناة:«كنت يوميًا بعيط من الوجع»

كشفت الفنانة راندا البحيري عن تفاصيل معاناتها مع مرض بطانة الرحم المهاجرة، من خلال منشور عبر حسابها الرسمي على موقع «فيس بوك»، تحدثت خلاله عن رحلة استمرت نحو 7 سنوات، عانت خلالها من الألم المستمر وتناول المسكنات والحقن، إلى جانب تأثير الأدوية على وزنها وحياتها اليومية.

وقالت راندا البحيري: «إلى كل مريضة بطانة رحم مهاجرة، قلبي معاكي، حاسة بيكي، أنا عديت بكل اللي عديتي بيه، وإن شاء الله هنقل لكم تجربتي. وإن شاء الله محدش يشوف حاجة وحشة أبدًا، ده مرض أنا عمري ما أتمناه أقسم بالله لعدوي، ده لو كان عندي عدو. ولا عمري كنت أتخيل إن فيه حاجة أصعب من المرض الخبيث، لكن طلع فيه، لأن الـbehavior بتاعه فعلًا أصعب منه.. الحمد لله، الحمد لله، الحمد لله».

وأضافت: «أنا بعاني من المرض ده بقالي يمكن 7 سنين تقريبًا، 7 سنين عايشة مع الألم، و7 سنين عايشة مع المسكنات والحقن والمستشفيات. كنت يوميًا بعيط من الوجع، وكنت يوميًا باخد من حقنة لـ3 حقن، وأنام بقية اليوم».

وتحدثت راندا البحيري عن الضغوط التي واجهتها خلال فترة مرضها، موضحة أنها كانت مضطرة إلى مواصلة العمل وتحمل المسؤوليات رغم معاناتها الصحية، وقالت: «كنت بتحارب من أشخاص في نفس وقت مرضي، وكنت مضطرة أرد عليهم وأقف قصادهم بأي شكل، علشان الحياة لازم تكمل. كنت بصرف على بيتي وعلى بيوت تانية، وكنت مضطرة وأنا عيانة بمرض خطير إني أقف على رجلي وأشتغل، حتى لو مش شايفني بعمل مسلسلات وأفلام جديدة كتير، إنما أنا عندي شغل تاني بعمله».

واستكملت: «المرض ده قرر يوقفلي حياتي، وأنا بفضل الله رفضت إن حياتي تقف، وجيت على نفسي وكملتها».

وأشارت الفنانة إلى تأثير الأدوية التي كانت تتناولها على وزنها، وما تعرضت له من تعليقات مسيئة خلال تلك الفترة، قائلة: «الأدوية اللي كنت باخدها خنتني جامد، وفي فترة من الفترات كنتوا كلكم بتتنمروا عليَّ. كنت باخد الكلام ده وأسكت، وأقول الحمد لله، كل شتيمة وكل لجنة وكل كومنت سيئ هاخد من حسناته، وهيمسح من سيئاتي».

كما وجهت راندا البحيري الشكر إلى الأطباء المصريين والقطاع الطبي في مصر، مؤكدة أنها عانت لعدة أشهر دون أن تتحدث عن تفاصيل مرضها، وقالت: «أخيرًا، علشان مطولش، ولسه هحكيلكم أكتر إن شاء الله، أنا أهم حاجة عندي إني أنحني شكرًا للدكاترة المصريين والقطاع الطبي في مصر».

وأضافت: «شهور طويلة وأنا معاكم هنا وبعاني، ومكنتش بتكلم، علشان كل واحد فيه اللي مكفيه، وأنا دايمًا بظهر الجانب اللطيف واللي فيه entertaining علشان الناس تتبسط، أو اللي فيه وعي لو عندي حاجة عايزة أوصلها».

وأكدت راندا البحيري أن حديثها عن تجربتها مع المرض لا يستهدف استعراض معاناتها، وإنما يأتي لمساندة السيدات اللاتي يمررن بالتجربة نفسها، قائلة: «المرة دي كمان أنا مقولتش ده من باب إني أوريكم أنا مريت بإيه، لا والله والله. أنا بقوله لكل مريضة بطانة رحم مهاجرة: أنا زيك، شوفت اللي شوفتيه ويمكن أكتر، حاسة بيكي وبكل حاجة حصلتلك، وعارفة إنك لفّيتي على دكاترة العالم كله علشان ده مرض محدش كان لاقيله علاج، ولا كان حد فاهمه».

واختتمت الفنانة حديثها بالتأكيد على استعدادها لمشاركة تجربتها والإجابة عن استفسارات المريضات بشأن رحلتها مع بطانة الرحم المهاجرة، في محاولة منها لتقديم الدعم لكل من تعاني من المرض.