ياسمينا العبد: «كان حلم طفولتي أفتح ستوديو رقص.. ومساحة الدور مش شرط تكون كبيرة»

تحدثت الفنانة الشابة ياسمينا العبد في حوارها مع عباس أبو الحسن، عن العديد من التفاصيل التي تخصها، وتحدثت عن دعم أسرتها وبعض التفاصيل عن حياتها الخاصة.

وتابعت ياسمين في تصريحاتها بـ«حوارات مع عباس»، متحدثة عن أحلام طفولتها وبداياتها: «كان حلم الطفولة إني أفتح ستوديو رقص وأبقى مدربة رقص، بعدها انضميت لكورال غنائي فبقى حلمي الغناء».

وعن ردود الأفعال حول دورها في مسلسل «البحث عن علا»، قالت: «أنا كنت مبسوطة جدًا بتجربة البحث عن علا بس عمري ما توقعت إن الشخصية حد يركز معاها أو تعلق مع الناس بالشكل ده، فاتخضيت جدًا من ردة فعل الجمهور واتبسطت بيها جدًا».

وتطرقت للحديث عن مشاركتها في مسرحية «سكر»، مضيفة: «أنا درست مسرح غنائي فكنت متحمسة جدًا لما جتلي فرصة مسرحية سكر، بالذات عشان كان فيها تحديات كتيرة، لأن ثقافة المسرحيات الغنائية مش منتشرة في العالم العربي بشكل كبير وكمان المسرحية كانت باللغة العربية فاتحمست جدًا إني أكون جزء منها واتبسطت جدًا بالتجربة الصراحة».

وأشارت إلى حرصها على التنوع واختلاف أدوارها عن شخصيتها الحقيقية، حيث أوضحت: «أنا مش شرط أعمل الشخصيات اللي شبهي تمامًا، يعني شخصيتي في البحث عن علا كانت قريبة مني في الحقيقة جدًا، لكن في ميدتيرم لأ خالص مكنش ليها علاقة بيا، في موضوع عائلي شخصية شيماء مكنش ليا أي علاقة بيا برضو».

وفيما يخص معاييرها في الموافقة على الأعمال الفنية، تابعت: «أنا بحس إن من أكتر الحاجات اللي بيبقى ليها تأثير حقيقي على الجمهور بيبقى الحوار والكتابة، عشان كده دي من أكتر الحاجات اللي بهتم بيها في أي عمل وأنا بختار، إن الحوار يكون واقعي وحقيقي مش أوفر وبيلمس مشاعر الجمهور».

وشددت على أن حجم الدور ليس مقياسًا بالنسبة لها، قائلة: «آخر حاجة بهتم بيها في اختياري للدور هو حجمه، عشان ممكن يكون عدد المشاهد قليل بس الدور محوري جدًا، زي ما بيقولوا No small roles، only small actors».

وحول رؤيتها الشاملة لدراسة التمثيل، أكدت: «أنا من رأيي الشخصي، أنا مش مع فكرة إن الممثل يبقى دارس تمثيل بس لمدة 3 أو 4 سنين بس، لأنه هو تجربة عملية جدًا مش هتخلص في كتب ودراسة أكاديمية بس، لازم الممثل يبقى عنده خلفية في الكتابة وفي الإنتاج وكمان في الـ business وفي الاقتصاد وحاجات كتير عشان المجال مش بس اللي بيظهر قدام الكاميرا، لأ هو مليان تفاصيل كتير وحسبة كبيرة وEco system كامل».

وعن رأيها في أبناء جيلها من صناع الفن، أردفت: «في كُتاب ومخرجين من جيلي وأصغر كمان كتير جدًا وشاطرين جدًا، بيخترعوا حاجات جديدة ومش منتشرة ويقدر الكل يوصلها، إحنا جيل لو عايز يعمل حاجة هيعملها مش هيبقى مستني يعتمد على حد عشان يعمله فكرته».

واختتمت ياسمينا حديثها بالكشف عن موقفها من العمل في الخارج، موضحة: «أكيد حابة أشتغل بره وبدور بس أنا بهتم جدًا بشغلي هنا في الأساس لأن الأدوار هنا مهمة والناس اللي بشتغل معاهم مهمين، مش حابة أبقى بسعى لأدوار بره اللي هي أساسًا مش شبهنا ولا شبه مبادئنا وأغير مبادئي عشان بس همثل مع فلان الفلاني بره، حلو تمام بس هنا برضو مهم بالنسبة لي لأن إحنا عندنا كل اللي ممكن نبقى محتاجينه عشان نبقى بنفس أهمية الفن بره، فليه نجري ورا ناس مش عايزانا أصلًا!».