وزير الكهرباء: الذكاء الاصطناعي يستهلك كهرباء أكثر مما يمكن تخيله

قال الدكتور محمود عصمت، وزير الكهرباء والطاقة المتجددة، خلال حواره مع الإعلامية لميس الحديدي ببرنامج "الصورة" عبر فضائية "النهار"، إن الذكاء الاصطناعي بيستهلك كهرباء أعلى من أي حاجة تانية ممكن حد يتخيلها، وأن السبب في ذلك أن الذكاء الاصطناعي عبارة عن مجموعة سيرفرات وكمبيوترات بتعمل بروسيس طول الوقت وفيها تواصل طول الوقت، وأنه بيستهلك كهرباء عالية وبتحتاج كمية تبريد عالية جدًا لأنه بيحصل هيت ديبيشن عالي من الأجهزة اللي بتشتغل.

وأضاف عصمت خلال برنامج "الصورة" عبر فضائية "النهار"، أن الأحمال العادية زي المصانع بتشغل طلمبتين من ثلاثة أو بتشغل الستاند باي واللي ممكن يقفل، لكن الذكاء الاصطناعي بيبقى عكس كده تمامًا لأنه بيشتغل بشكل مستمر، وأن كل الأحمال دي طلبات إضافية موجودة، وأن الوزارة خصصت قدرات 1 جيجا بالتعاون مع وزيرة الاتصالات لتلبية طلبات الذكاء الاصطناعي الموجودة حاليًا.

وأشار إلى أن هناك 3.4 جيجا من المصانع كثيفة استهلاك الطاقة متوافق عليها وتتنفذ حاليًا أو في طريق التنفيذ، وأن دي على جنب من نسبة النمو الطبيعي اللي بتتراوح بين 6 و7%، وأن هناك أكثر من 11 جيجا مطلوبة من الوزارات المختلفة حتى 2030 لتلبية كل متطلبات الوزارات واحتياجاتهم من الطاقة الكهربائية.

وتابع أن محطة الضبعة هتضيف 4.8 جيجا قدرات توليدية على الشبكة، وأن قدرة الضبعة لما نقول 4.8 بتشتغل على 95% أو 99% من القدرة دي، يعني مش حاجة من الحاجات اللي بتشتغل بارشال لود أو بنرجعها ناخد منها جزء، وأنها هتكون إضافة كبيرة للشبكة الكهربائية المصرية.

وشدد وزير الكهرباء والطاقة المتجددة على أن التخطيط للقدرات الجديدة بيتم بنسب 20% و50% و60% من القدرات المطلوبة علشان الوزارة تعمل التخطيط بتاعها، وأن بعض المشروعات ممكن تتأخر أو يعاد جدولتها في ضوء حاجات أخرى، لكن الوزارة بتاخد دائمًا بنسب تحوطية في التخطيط، وأن مشروعات الإسكان الجديد وتطوير العشوائيات والصناعة بتضيف أحمالًا جديدة للشبكة، وأن الدولة مستمرة في ضخ الاستثمارات لتلبية كل هذه الاحتياجات.