شقيقة أحمد حلمي تشيد بفيلم «حدوتة»: «عمل يستحق التدريس ويحاكي واقع أطفالنا»

أشادت شقيقة الفنان أحمد حلمي بفيلمه الجديد «حدوتة»، معربة عن سعادتها بالنجاح الذي يحققه منذ انطلاق عرضه الأول يوم 11 نوفمبر، مؤكدة أن العمل يحمل رسائل مهمة تتعلق بتربية الأطفال وتأثير الأسرة والمدرسة والمجتمع في تكوين شخصياتهم.

وقالت شقيقة أحمد حلمي، في منشور عبر حسابها على «فيس بوك»: «بعد كل الكلام الجميل اللي سمعته عن أحمد حلمي.. ولسه بسمعه.. ولسه إن شاء الله هسمعه.. من يوم 11/11 يوم العرض الأول لفيلم (حدوتة) وأنا قلبي فرحان بأحمد وبنجاح فيلمه الجديد».

وأضافت موضحة سبب سعادتها بنجاح شقيقها: «أولًا.. لأنه أخويا الكبير، وأنا بفرح لما أسمع عنه كل جميل، وقلبي بيفرح لما بشوفه ناجح يوم ورا يوم، ولما بشوف حب الناس ليه.. ربنا يا حبيبي يزيدك من فضله».

وتابعت متحدثة عن رؤيتها للفيلم من واقع خبرتها في علم النفس والطفولة والمراهقة: «لقيت نفسي لازم أقول، بحكم دراستي وشغلي في علم النفس والمراهقة والطفولة، اللي بقالي فيها 30 سنة، إن ده فيلم يتدرس! الفيلم حقيقي، يتدرس، لأنه من أرض واقع كتير من الأطفال.. كل لقطة فيه وراها دروس كتير».

وأشارت إلى أن الفيلم يتجاوز كونه عملًا سينمائيًا، قائلة: «كلماتي في البوست ده مش مجرد تحليل لفيلم سينمائي، ده وقوف على أرض واقع، لأن ده والله مش مجرد فيلم... دي رسالة لكل أم وأب واللي بيربوا... دي رسالة للناس اللي بتوجع وتجرح بس... دي رسالة لمُعلمين كتير جوا مدارس واللي بيعلموا... دي رسالة لأطفال كتير.. ممكن يحولوا أي طفل من إنسان عادي لإنسان مليان خوف ووجع.. دي رسالة لمجتمع كامل... دي رسالة كل واحد فينا لنفسه... حقيقي فيلم يتدرس».

واختتمت منشورها بالتأكيد على أهمية مشاهدة الفيلم قبل الحكم على رأيها، قائلة: «ما تحكمش على كلامي دلوقتي علشان ما تحسش إني شهادتي مش حقيقية عن الفيلم. استنى لما تشوفه، إن شاء الله لو حتى بعد سنة، ساعتها هتفهم معنى الفيلم ومعنى كلامي. حقيقي فيلم يتدرس».

ووجهت رسالة إلى شقيقها في ختام المنشور: «شكرًا من قلبي على الفيلم الجميل ده، حقيقي أنا بحبك وفخورة بيك».