باسم يوسف يوجه رسائل عن «السوشيال ميديا» في منتدى مصر 2026.. وتفاعل من الرئيس السيسي (فيديو)

تصدر الإعلامي والممثل الكوميدي ومقدم البرامج باسم يوسف في منتدى مصر 2026، تريند مواقع التواصل الاجتماعي، بعدما شارك من خلال تقرير مصور بعنوان «وراء الشاشة»، تحدث خلاله عن تأثير مواقع التواصل الاجتماعي على العلاقات بين الأفراد والشعوب، محذرًا من دور بعض الحسابات في تأجيج الخلافات ونشر الكراهية بين الشعوب العربية.

واستهل باسم يوسف كلمته بالاعتذار عن عدم الحضور شخصيًا إلى المنتدى، بسبب ارتباطه بجولة فنية خارج مصر، قائلًا: «أخباركم إيه في مصر؟.. أنا آسف معلش، أنا بكلمكم من ورا الشاشة، أنا وسط الجولة بتاعتي، وطالع بعد شوية أعمل عرض في المسرح هنا، فبعتذر عن اللخبطة والبعد ده.. إزيكو؟».

وأضاف: «أنا عايز أقول كلمة قصيرة، الموضوع كان سبب نجاحي وشهرتي، وأحيانًا كان برضه سبب مشاكل كتير حصلتلي، اللي هو السوشيال ميديا، والحقيقة السوشيال ميديا زي ما هي مهمة ومفيدة ليا ولملايين الناس حوالين العالم، الواحد بدأ يشوف جوانب تانية بتأثر على حياتنا اليومية بطريقة مش لطيفة».

وتابع أن مواقع التواصل الاجتماعي تؤثر على العلاقات بين الناس، موضحًا: «مش انتو ساعات كده بتخشوا على السوشيال ميديا وبتحسو فجأة كده لما بتتناقشو إن ضغطك على ونرفزتك زادت، وعمال تتخانق مع دبان وشك، وناس ما كانش عندك معاهم أي مشكلة، ابتديت تقلب عليهم وتكرههم وتحملهم كل المشاكل اللي حواليك؟!».

وأشار باسم يوسف إلى أن الخلافات عبر مواقع التواصل الاجتماعي قد تمتد إلى العلاقات بين الشعوب العربية، مستشهدًا بما يحدث أحيانًا بين الجماهير على خلفية مباريات كرة القدم، وكذلك الخلافات التي تظهر بين المصريين والمغاربة والسعوديين، إلى جانب ما يتعرض له السوريون والسودانيون من مواقف سلبية.

وقال: «فجأة ماتش كورة يقلب بشتيمة بينا وبين إخواتنا في المغرب، واللي حصل في مصر لإخواتنا وضيوفنا من سوريا والسودان، فجأة نصحى نلاقي نفسنا ماسكين فيهم وهما ماسكين فينا من غير مناسبة، هوب تلاقينا ماسكين في إخواتنا في السعودية (يا طعمية يا كبسة)، مش إحنا بنشوف كده؟!».

وأوضح أن بعض الخلافات تتضخم بصورة مبالغ فيها نتيجة تدخل حسابات تستهدف إشعال الأزمات، قائلًا: «للأسف ده جانب متوقع من الإنترنت، اللي بيخش المجال المفتوح ده هيتعرض لده، لكن أنا وأنتم عارفين إن فيه حاجات بتولع بطريقة مبالغ فيها، حتى لو كان في سبب للخلاف والخناق ما بين ناس قليلين في بلدين أخوات، تلاقي الخلاف والزعل ده كبر وتضخم، وما تعرفش الشعللة دي جت منين».

وأضاف: «بس إحنا بقينا عارفين، عارفين الحسابات اللي لا هي مغربية ولا مصرية ولا سعودية، اللي بتخش تولع الدنيا وتوسع الخلاف والكراهية دي».

وشدد باسم يوسف على أن تجاربه في السفر وإقامة العروض الفنية خارج مصر كشفت له عن مشاعر المحبة والتقارب بين الشعوب، مؤكدًا أن اختلاف الجنسيات لم يكن عائقًا أمام اجتماع الجمهور العربي في أجواء من الألفة والضحك.

وقال: «أنا سافرت وشوفت بعيني الحب ما بين أهلنا في الدول العربية والبلاد الغربية، آلاف الناس من كل الجنسيات بيحضروا حفلاتي، وما شوفتش منهم غير كل حب وتلاحم وراحة وونس. أنا هنا دلوقتي في مسرح من دول، وبعد شوية هيبقى مليان ناس من كل الجنسيات العربية، بنضحك وننبسط مع بعض».

وتابع: «أيوة إحنا بينا خلافات، وأيوة إحنا ساعات بيحصل بينا غلط، بس إحنا أكبر من كده، وأعتقد في الأوقات دي إحنا محتاجين إننا ما نخليش الخلافات دي تفرق بينا وتكبر أكبر من كده».

واختتم باسم يوسف كلمته بالتأكيد على أهمية عدم السماح لمواقع التواصل الاجتماعي بالتأثير سلبًا على الحياة اليومية والعلاقات الإنسانية، قائلًا: «أنا عارف إن إحنا بنهرب ساعات من حياتنا وبنقضي وقت على السوشيال ميديا، لكن أتمنى إن السوشيال ميديا ما تفسدش علينا حياتنا. وحشتوني، أشوفكم قريب، وإن شاء الله أزور المتحف المصري، وأرجع أعمل كايت سيرفينج، وآكل مانجا عويسي، وبعد إذنكم عشان عندي شوية ناس أضحكهم».

وتفاعل الرئيس عبدالفتاح السيسي بالابتسامات خلال عرض كلمة باسم يوسف، التي تناولت تأثير مواقع التواصل الاجتماعي على العلاقات المجتمعية، ودورها في توسيع الخلافات بين الشعوب، بدلًا من تعزيز التواصل والتقارب بينها.