هدى هاني عن محمد صبحي: «علّمني أن المسرح أصعب بكتير من الفيديو»

كشفت الفنانة هدى هاني عن أبرز ما تعلمته خلال عملها مع الفنان محمد صبحي، متحدثة عن تجربتها معه منذ طفولتها في مسرحية «الهمجي»، وكيف ساهمت تلك التجربة في تشكيل خبرتها الفنية وتعليمها الالتزام والصدق في الأداء.

وقالت هدى هاني، خلال لقائها مع يمنى بدراوي في برنامج «ورقة بيضا»: «أستاذ محمد صبحي أنا كنت معاه الأول في (الهمجي)، فأول ما اتعلمت معاه كنت طفلة يعني على المسرح، فأول ما اتعلمت معاه اتعلمت معاه مسرح. المسرح أصعب بكتير من الفيديو بكتير، اللي إنتي بتعمليه لازم كل يوم، ولازم مكان معين توقفي فيه، لو خطوة ورا أو خطوة قدام تلاقيه اتنرفز ويعملك كده ويشاورلك على المسرح وانتي: إيه أروح فين أعمل إيه؟».

وأضافت: «بروفات كتيرة جدًا، يعني عمل معايا بروفات كتيرة أوي أوي لوحدي يوميًا، وإزاي أعيط على المسرح، كل يوم تعيطي في نفس الوقت على مسرح! هو الدموع مش هتبان للناس زي الفيديو يعني، بس الإحساس.. إن إزاي إحساس المسرح يوصل.. كل يوم تعملي ده كان صعب جداً».

وأوضحت أن تلك التجربة أفادتها كثيرًا عندما وقفت أمام الكاميرا في سن صغيرة، قائلة: «ده فادني أوي بقى لما جيت أقف قدام الكاميرا وأنا صغيرة برضه بس فادني أوي، فمتعلمتش بسهولة».

وتابعت متحدثة عن الصفات التي تعلمتها من محمد صبحي: «الأستاذ لا لا يعني.. أستاذ صبحي تتعلمي منه تمثيل، تتعلمي منه التزام، تتعلمي منه صدق، تتعلمي منه احترام لنفسك أولًا».