«اللي بيحبني يباركلي ويدعيلي».. نادر أبو الليف يعلن عقد قرانه

أعلن المطرب نادر أبو الليف عقد قرانه على سيدة تدعى قوت المغازي، وذلك من خلال منشور عبر حسابه الرسمي على مواقع التواصل الاجتماعي، عبّر فيه عن سعادته بهذه الخطوة، وطلب من جمهوره ومحبيه الدعاء له بالتوفيق.

وكتب أبو الليف: «بفضل الله ونعمته تم عقد قراني من ست الحسن والجمال المخلصة الأصيلة بنت الناس المحترمة قوت المغازي، اللي بيحبني يباركلي من قلبه ويدعيلي ربنا يعوضني الخير ويقدرني يارب العالمين».

في سياق آخر، كان استغاث المطرب نادر أبو الليف بسبب أزمة الميراث التى تجمعه بشقيقه، كاشفًا عن معاناته المستمرة منذ أكثر من 10 سنوات داخل أروقة المحاكم، نتيجة خلافات عائلية على شقة ورث، مؤكدًا أن الأزمة تسببت له فى حالة كبيرة من الإرهاق النفسى والاستنزاف المعنوى.

وكتب نادر أبو الليف، عبر حسابه الرسمى على موقع التواصل الاجتماعى «فيسبوك»: «عايز أعرف ليه الناس ضمايرها ونفوسها وأخلاقها وتربيتها اتغيرت من جواها، كل واحد بقى يهمه نفسه فقط لا غير ومش مهم أى حد على وجه الأرض كله بيقول يا نفسى وطز فى الآخرين حتى للأسف الشديد أخوك ابن أمك وأبوك اللى نازل انت وهوه من رحم واحد ومتربيين فى بيت واحد عايز ياكلك ويدوس عليك وياكل ورثك ليه خلاص مبقاش فى ضمير ونخوة ورجولة ودين ومبادئ وأخلاق ومراعاة للدم اللى بينك وبينه».

وأضاف: «يا ناس قسمًا بالله الكفن مالهوش جيوب وهتنزل التراب مش معاك غير عملك مش هتاخد حاجة معاك فكر كده لما تقابل رب كريم هتقوله إيه؟ هتقوله إنك كنت عايز تقتل أخوك علشان تورثه ولا هتقوله كنت عايز تاخد ورثه علشان انت ظالم ومفترى وحقودى وجواك حقد وغل وكره لأخوك وللكون كله، هو حصل إيه فى الدنيا يا ناس نفسى أعرف».

وتابع: «وللأسف معاه محامى حسبى الله ونعم الوكيل فيه كل لما نرفع قضية يروح المحكمة ويحفظها.. بقالى أكتر من عشر سنين دايخين فى المحاكم علشان نبيع شقة ورث وكل واحد ياخد نصيبه بما يرضى الله وللأسف المحاكم والقضايا إللى زى دى بتاخد سنين طويلة، نفسى يفوق ويحس ويعرف إننا إخوات وعمر الدم ما يبقى ميه لكن هوه للأسف الشديد ولا بيفكر ولا يهمه ولا شايف ولا سامع غير نفسه ومصلحته وطز فى أى حد ولو اتخذت أى شيء معاه للأسف الإعلام والصحافة مش هيسيبونى وهبقى محتوى للخوض فيا ومتكتف ومش عارف اتصرف ازاى وأعمل إيه».

واختتم أبو الليف: «أتمنى أتمنى أتمنى أى مسؤول أو أى حد يرد عليا بحل سريع ينهى موضوع الورث إللى هو حقى ومش عارف أخده من أخويا، وربنا يهديه لنفسه ويتقى ربنا ويعطى كل واحد حقه بما يرضى الله أتمنى الرد ولكم جزيل الشكر، نداء إلى كل من يهمه الأمر من الجهات المعنية وكل عيد وأنتم بخير».