أحمد سعد وألبومه الجديد في أزمة: «صوتي راح قبل ما أخلصه.. ومش عارف هينزل الأربع إزاي؟» (فيديو)

كشف الفنان أحمد سعد أنه يتعرض لمشكلة جديدة بسبب صوته، مشيرًا أنه الفترة الأخيرة أصبح يشعر أن صوته «رايح» بسبب تعرضه لوعكة صحية.

وقال في فيديو نشره عبر حسابه الرسمي بـ«فيس بوك»: «عندي مشكلة كبيرة جدًا، صوتي رايح جدًا، صوتي راح، يعني مش عارف أعمل إيه. صوتي من الأفراح، وعندي مشكلة أكبر بكتير إن أنا عندي ألبوم، المفروض الألبوم ده هنزله يوم الأربع اللي جاي، وعندي أغاني لسه ما غنيتهاش، وأعلنت فعلاً إن أنا هنزل الألبوم يوم الاربع».

وتابع: «صوتي تعبان جدًا، وصوتي مش عارف إيه، يعني مش عارف أتكلم، طبعا ناس تقعد تقول لي ما تقعدش تغني وتزعق في الأفراح قوي، علشان بس أنا والله العظيم من قلبي، والله العظيم ما حد بيطلب مني أن أنا اعمل كده، أنا من قلبي بحس أن أنا فرحان زي الناس. بس وصل الموضوع لأزمة كبيرة جدًا جداً أن صوتي راح، وعندي ألبوم المفروض ينزل ينزل يوم الأربع اللي جاي وعندي أغاني ما غنيتهاش».

وتابع: «وعندي حل من الحلول، يا إما ألغي النزول يوم الاربع اللي جاي، يا إما أنزل أغنيتين بس ولما أغني بقية الألبوم لأن المفروض إن ده الألبوم رقم 4 وهنزل المفروض.. هنزل خمس أغاني زي ما عودت الناس يعني».

واختتم: «والمهم إن الألبوم ده أصعب ألبوم في الغنا، ده أصعب ألبوم بالنسبة لي في الغنا، لأنه ألبوم الموسيقى العربية حاجة طول عمري بحلم بيها، وهو ده أنا بقول هو ده أنا، يعني دي أنا.، لما ألاقي صوتي مش مساعدني أن أنا أغني، أنا بجد زعلان جدًا، مش زعلان هو راح في إيه يعني صوتي راح في إيه، بس زعلان إن هو يعني صوتي مش مطاوعني في الفترة دي يعني، على العموم يا إما أجّل، يا إما هنزل الأغاني اللي غنيتها. شكرًا».