«شكرًا على إخلاصك وحبك لشغلك».. مدير تصوير «طالع نازل» يكشف لقطات عفوية من الكواليس ويوجه رسالة لـ منى زكي

كشف مدير التصوير محمود يوسف، عدة لقطات عفوية من كواليس مسلسل «طالع نازل» الجاري عرضه حاليًا، والذي حقق تفاعلًا قويًا منذ عرض الحلقات الأولى والثانية.

وكتب «محمود» في منشوره عبر حسابه بـ«انستجرام» عن التعاون مع منى زكي: «الشغل مع منى زكى ممتع وملهم وكل مرة بنشتغل مع بعض بحس إن الشغل بيعلى وبيتطور خطوة لقدام وإنى بتعلم حاجة جديدة».

وتابع: «عشان هي مش بس ممثلة موهوبة لكن عندها التزام واحترافية وشغف وحب حقيقى للسينما والفن بيخلّوا كل اللى حواليها عايزين يطلّعوا احسن ما عندهم لإنك مش بتشتغل مع مجرد فنانة كبيرة انت بتتعلم من واحدة عارفة يعنى ايه تحترم مهنتها وتحترم كل تفصيلة وكل شخص موجود حواليها ويمكن ده سر تميزها واختلافها».

عرض هذا المنشور على Instagram

تمت مشاركة منشور بواسطة ‏Mahmoud Youssef‏ (@‏myussif‏)‏

وأردف: «اشتغلت معاها وانا لسه بتدرب وبعدها وأنا مساعد ودلوقتى وأنا مدير تصوير وعلى مدار السنين دى شفتها بتتطور كممثلة وفنانة وكل مرة بتبهرنى وفى نفس الوقت فضلت نفس الإنسانة اللى عندها نفس الإخلاص والشغف والحب لشغلها».

وأضاف: «منى زكى موهبة حقيقى مجاش ومش متخيل ييجى زيها تاني.. شكرًا يا منى على إخلاصك وحبك لشغلك وعلى كل حاجة حلوة اتعلمتها منك واللى ما اشتغلش معاكى فايته كتير جدًا».

وأختتم منشوره قائلًا: «أنا محظوظ وفخور إنى كنت جزء ولو صغير من تاريخها الفنى الكبير ربنا يحفظك لينا ونفضل نستمتع بوجودك وبالشغل معاكي».