«جسمنا مش عيب ولا عورة».. هنا شيحة تثير الجدل بتصريحاتها في مهرجان الجونة

تصدرت الفنانة هنا شيحة الترند على مواقع التواصل الاجتماعي، بعد تصريحاتها عن ضرورة توعية الأطفال بأجسادهم، وتعليمهم احترام حدود الآخرين، إلى جانب حديثها عن التحرش والموافقة في العلاقة الزوجية، وهي موضوعات ترى أنها ظلت لسنوات طويلة بعيدة عن النقاش الصريح داخل المجتمع.

وقالت هنا شيحة، خلال لقائها مع قناة «النهار» على هامش حفل ختام الدورة التاسعة من مهرجان الجونة السينمائي: «جسمنا مش عيب ومش عورة ومحتاجين يبقى عندنا وعي أكتر بنفسنا وبجسمنا، ومش عيب إنك تكلمي بنتك أو ابنك إزاي تحترم الجسد، وإزاي تحترم البنات وتاخد بالك منهم، وإزاي البنت يبقى عندها الوعي ده».

وأضافت أن هناك أجيالًا لم تحصل على التوعية الكافية بشأن هذه الموضوعات، موضحة: «في جيل كامل مبنتكلمش بصراحة ومبنقولش الحاجات بأساميها بصراحة، ومبنعلمش بناتنا عن جسمهم، ومبنعلمش بناتنا إزاي يعرفوا يتعاملوا مع الآخرين، ولا الولاد ولا البنات، مش بس قصدي أتكلم عن البنات، بتكلم عن الأولاد بصفة عامة، الجيل الجديد ذكور أو إناث، والجيل القديم وإحنا مكانش عندنا برضو».

وتابعت هنا شيحة حديثها عن أهمية معرفة الحدود الشخصية واحترام الآخرين، قائلة: «يعني إنك تبقى عارف حدودك فين وحدود الآخرين فين، وإن أنت تبقى عارف إزاي تتعامل مع نفسك ومع الآخرين، وتبقى عارف إيه الصح وإيه الغلط».

وأشارت إلى أن بعض المفاهيم التي لم يكن يجري الحديث عنها بوضوح في الماضي أصبحت تحظى باهتمام أكبر، موضحة: «في مفاهيم كتيرة جدًا غلط ابتدت تتعرف دلوقتي أكتر، مثلًا إن ده اسمه تحرش، زمان مكانش ده بيبقى موجود، إن في حاجة اسمها لازم تبقى موافق في العلاقة الزوجية، ولما تحب محدش يغصب عليك، الحاجات دي كلها دلوقتي ابتدى يتسلط الضوء عليها، زمان محدش كان بيتكلم فيها».

كما تحدثت عن أهمية توعية الفتيات بالتغيرات الجسدية التي يمررن بها، مشيرة إلى حضورها ندوة عن تمكين الفتيات الصغيرات وتعريفهن بأجسادهن، قائلة: «حضرت ندوة بتتكلم عن تمكين البنات الصغيرين وتعليمهم عن جسمهم، ويعني إيه دورة شهرية، إزاي ميخافوش، لأن في ناس لحد دلوقتي مبيعلموش بناتهم، وبيبقى في جهل، لو أنت مش عارف هتعرف إزاي؟ أو بيبقى في كسوف».