«الراجل بيحس إن عنده استحقاقية».. منى زكي تكشف رأيها في تعدد الزوجات بعد جدال مع عمرو أديب

تحدثت الفنانة منى زكي عن نظرتها للرجال الذين يدخلون في أكثر من علاقة عاطفية في الوقت نفسه، موضحة أن بعض الرجال يرون أن من حقهم الجمع بين امرأتين، وأن كل علاقة تمنحهم شيئًا مختلفًا، لكنها أكدت رفضها لهذا التصور، خلال حوارها مع الإعلامي عمرو أديب في برنامج «الحكاية».

وقالت منى زكي خلال اللقاء: «أنا باحس إن الرجالة اللي بيحبوا اتنين بيبقى شايف إنه عنده استحقاقية لده، يعني هو كطبيعة بني آدم بيبقى شايف استحقاقية في إنه يحب دي ويحب دي، وإنه دي تبقى علاقة مختلفة بياخد منها فؤاد بطريقة، ودي.. والله أنا باتكلم بجد، بتبقى استحقاقية من الراجل بيبقى شايف كده».

وسألها عمرو أديب: «إنتي شايفة إن الراجل يستحق ده؟ إن يبقى عنده الاستحقاقية دي؟»، لترد منى زكي: «لا ما أنا عارفة إنك بتوصلني لكدا، لا طبعًا»، قبل أن يضيف مازحًا: «والله ليه إنتي متخيلة إن في مؤامرة، دانتي أستاذة المؤامرات».

وعاد عمرو أديب للاستفسار عن المقصود بكلمة «استحقاقية»، قائلًا: «إنتي قولتي لي دلوقتي إن الراجل بيدي نفسه استحقاقية، كلمة استحقاقية دي يعني شيء حقه، ولا أنا فاهم غلط؟».

وأوضحت منى زكي: «لأ، بيدي لنفسه.. هو، إنما ده مش معناه إن هو حقه»، وعندما سألها أديب عما إذا كان ذلك من حق الرجل، أجابت: «لأ أكيد لأ، عمره ما هيعرف يعدل يعني».

وأضاف عمرو أديب: «آه، بس هو بياخد من كل واحدة حاجة»، لترد منى زكي: «أكيد، كل واحدة بيبقى شايف إن هو عنده الاستحقاقية دي إن كل حد هو في علاقة معاه بيقدر تديله حاجة معينة يعني».